भुसावळसह जिल्ह्यातील नगरपरिषद आणि नगरपंचायतीच्या आरक्षणाची सोडत सोमवारी निघणार ! बिगुल वाजला!
मुंबई, दि. ०३ ऑक्टोबर २०२५: सुप्रीम कोर्टाच्या आदेशानुसार राज्य निवडणूक आयोगाने ३१ जानेवारी पर्यंत राज्याची स्थानिक स्वराज्य संस्थांच्या निवडणुका पार पडण्या असल्याचे जाहीर केलेले आहे. त्या अनुषंगाने महाराष्ट्रातील नगरपरिषदा आणि नगरपंचायतींच्या नगराध्यक्ष पदाच्या आरक्षणाची सोडत येत्या सोमवारी, दि. ०६ ऑक्टोबर २०२५ रोजी मंत्रालयातील परिषद सभागृह, ६ वा मजला, मुंबई येथे आयोजित करण्यात आली आहे. या सोडतीच्या आयोजनामुळे राज्यातील राजकीय पक्षांमध्ये आणि गेल्या काही वर्षांपासून निवडणुकीच्या तयारीसाठी गुडघ्याला बाशिंग बांधून बसलेल्या संभाव्य उमेदवारांमध्ये उत्साहाचे वातावरण निर्माण झाले आहे.
राज्य शासनाच्या नगर विकास विभागाने जारी केलेल्या पत्रानुसार, राज्यातील २४७ नगरपरिषदा आणि १४७ नगरपंचायतींच्या नगराध्यक्ष पदाचे आरक्षण निश्चित करण्यासाठी ही सोडत काढली जाणार आहे. या प्रक्रियेसाठी सर्व राजकीय पक्षांना आपले दोन प्रतिनिधी पाठवण्याचे आवाहन करण्यात आले आहे. मंत्रालयातील सुरक्षिततेच्या कारणास्तव प्रवेश मर्यादित ठेवण्यात आला असून, पक्षांच्या अध्यक्ष/सचिवांना त्यांच्या प्रतिनिधींची शिफारस करून सोडतीसाठी पाठवण्यास सांगितले आहे.
उमेदवारांमध्ये उत्साह:
नगराध्यक्ष पदाच्या आरक्षणाची सोडत जवळ येताच, राज्यातील नगरपरिषदा आणि नगरपंचायतींच्या निवडणुकीसाठी इच्छुक उमेदवारांमध्ये उत्साहाचे वातावरण आहे. आरक्षण निश्चित झाल्यानंतर निवडणूक रणधुमाळीला खऱ्या अर्थाने सुरुवात होणार आहे. विविध राजकीय पक्षांनी आपल्या रणनीती आखण्यास सुरुवात केली असून, स्थानिक पातळीवरील नेते आणि कार्यकर्ते या सोडतीच्या निकालाकडे डोळे लावून बसले आहेत. विशेषतः अनुसूचित जाती, अनुसूचित जमाती, ओबीसी आणि महिला आरक्षणाच्या जागांबाबत उत्सुकता शिगेला पोहोचली आहे.
सोडतीचे महत्त्व:
नगराध्यक्ष पदाचे आरक्षण ठरविणारी ही सोडत स्थानिक स्वराज्य संस्थांच्या निवडणुकीत महत्त्वाची भूमिका बजावते. यामुळे कोणत्या जागा कोणत्या प्रवर्गासाठी राखीव राहणार, याचा निर्णय होईल. यामुळे राजकीय पक्षांना आपले उमेदवार निवडण्यासाठी आणि निवडणूक प्रचाराची दिशा ठरविण्यासाठी स्पष्टता मिळेल. सोडतीच्या निकालानंतर निवडणूक प्रक्रियेला गती येण्याची शक्यता आहे.
प्रशासनाची तयारी:
नगर विकास विभागाच्या उपसचिव प्रियांका कुलकर्णी छापवाले यांनी जारी केलेल्या पत्रात, मंत्रालयात सोडत प्रक्रिया पारदर्शक आणि सुरक्षितपणे पार पाडण्यासाठी सर्व तयारी पूर्ण झाल्याचे नमूद केले आहे. पक्षांच्या प्रतिनिधींना सोडतीस उपस्थित राहण्यासाठी योग्य शिफारशींसह येण्याचे निर्देश देण्यात आले आहेत.
