भुसावळ विभागात “जीवनदायी रक्तदान शिबिराचे” यशस्वी आयोजन –भारतीय रेड क्रॉस सोसायटी ब्लड बँक, जळगाव यांच्या सहयोगाने
भुसावळ,दि-09/05/25,आज भुसावळ विभागाने विभागीय रेल्वे रुग्णालय, भुसावळ येथे भारतीय रेड क्रॉस सोसायटी ब्लड बँक, जळगाव यांच्या सहकार्याने एक जीवनदायी रक्तदान शिबिर यशस्वीरित्या आयोजित केले. या उपक्रमाचा प्रमुख उद्देश स्थानिक आरोग्य व्यवस्थेला मदत करणे आणि रेल्वे कुटुंबीय तसेच सामान्य जनतेमध्ये स्वयंप्रेरित रक्तदानाबाबत जनजागृती निर्माण करणे हा होता.
या शिबिराला महाराष्ट्र राज्याचे माननीय वस्त्रोद्योग मंत्री श्री संजय सावकारे यांची उपस्थिती लाभली. त्यांनी आयोजकांच्या प्रयत्नांचे कौतुक केले आणि समाजाभिमुख उपक्रमांचे जीवन वाचविण्यातील महत्त्व अधोरेखित केले. जळगावचे जिल्हाधिकारी श्री आयुष प्रसाद यांनी देखील या कार्यक्रमाला उपस्थित राहून सहभागी रक्तदात्यांचे त्यांच्या उदात्त कार्याबद्दल अभिनंदन केले आणि आणि स्वत:ही रक्तदान करून एक प्रेरणादायी उदाहरण ठेवले.
दरम्यान, या शिबिरामध्ये भुसावळ विभागीय रेल्वे व्यवस्थापक श्रीमती इति पाण्डेय, अतिरिक्त विभागीय रेल्वे व्यवस्थापक (प्रशासन) श्री. सुनीलकुमार सुमन, अतिरिक्त विभागीय रेल्वे व्यवस्थापक (तांत्रिक) श्री. एम.के. मीणा, मुख्य वैद्यकीय अधीक्षक श्रीमती मंगला नारायणे, तसेच विविध वरिष्ठ शाखाधिकारी, कर्मचारी व त्यांच्या कुटुंबियांनी सक्रिय सहभाग घेतला. विभागीय रेल्वे व्यवस्थापक श्रीमती इति पाण्डेय यांनी सर्व रक्तदात्यांचे मन:पूर्वक आभार मानले आणि भारतीय रेल्वे केवळ परिवहनच नव्हे तर सामाजिक कल्याणातही आपले योगदान देत असल्याचे नमूद केले.
या शिबिरामध्ये एकूण १४३ रेल्वे कर्मचारी व त्यांच्या कुटुंबीयांनी रक्तदान केले. संकलित रक्ताच्या पिशव्या अनेक गंभीर रुग्णांचे प्राण वाचविण्यात मदत करतील. शिबिराचे आयोजन अत्यंत काळजीपूर्वक वैद्यकीय देखरेखीखाली व स्वच्छतेच्या दृष्टीने काटेकोर पद्धतीने करण्यात आले, जेणेकरून प्रत्येक रक्तदात्याला सुरक्षित व आरामदायक अनुभव मिळावा.
भुसावळ विभाग आणि भारतीय रेड क्रॉस सोसायटी ब्लड बँक, जळगाव यांच्यातील ही सहकार्याची भागीदारी समाजाच्या आरोग्यदायी उभारणीसाठी एक सकारात्मक पाऊल आहे आणि स्वयंप्रेरित रक्तदान संस्कृतीला चालना देणारी ठरते.
