रोहिणी एकनाथ खडसेंवर निवडणूक निरीक्षण अधिकारी मेहेरबान, जिल्हाधिकारी यांच्या कारवाईच्या आदेशाला बसवले ‘ढाब्यावर’
फुकटचे भत्ते लाटणाऱ्या अधिकाऱ्यांवर होणार कारवाई
जळगाव, दि-११/०४/२०२५, मुक्ताईनगर विधानसभा मतदारसंघ निवडणुकांतील उमेदवारांनी आयोजित केलेल्या प्रचाराच्या प्रत्येक रोडशो आणि मिरवणूकीवर होत असलेल्या खर्चावर नियंत्रण व देखरेख ठेवण्यासाठी महसूल आणि पोलीस प्रशासनाच्या काही अधिकाऱ्यांच्या भरारी आणि FST, VVT पथकांची नेमणूक जिल्हा मुख्य निवडणूक निर्णय अधिकारी तथा जिल्हाधिकारी यांनी केलेली होती. मात्र या निवडणुक अधिकाऱ्यांनी त्यांच्या निवडणूक निरीक्षणाच्या व देखरेख ठेवण्याच्या कर्तव्याची जबाबदारी पार न पाडता सावदा परिसरातील ढाब्यांवर बसून निवडणूक निरीक्षणाचे कार्य केल्याची माहिती समोर आलेली आहे. सदरील पथकाकडे व्हिडिओ कॅमेरे देऊन प्रत्येक रोडशो आणि निवडणुकीची व्हिडिओ शूटिंग करण्याची जबाबदारी देण्यात आलेली होती. सदरील व्हिडिओ शूटिंग करणे, आणि त्याचा डाटा जतन करणे, ही निवडणूक आयोगाच्या आदेशानुसार उमेदवार आणि निरीक्षण अधिकारी यांना बंधनकारक होते. मात्र दोघांनीही कोणतेही व्हिडिओ शूटिंग केलेले नसून , निरीक्षण अधिकाऱ्यांनी निव्वळ टाइमपास करून निवडणुकीचे भत्ते लाटलेले आहे. त्यामुळे या ठिकाणी निवडणूक आयोगाच्या आदेशांचे उल्लंघन झालेले आहे.
दरम्यान, दिनांक- १४/११/२०२४ रोजी सावदा ता. रावेर या शहरात राष्ट्रवादी काँग्रेस शरदचंद्र पवार गटाच्या उमेदवार रोहिणी एकनाथ खडसे यांच्या झालेल्या रोडशोसाठी अभिनेता व खासदार अमोल कोल्हे हे सुद्धा सहभागी झालेले होते. या रोडशोच्या निरीक्षण व देखरेख पथकातील अधिकारी ,कर्मचारी आणि उमेदवार रोहिणी एकनाथ खडसे यांनी निवडणूक आयोगाच्या पूर्वपरवानगीशिवाय केलेल्या बेकायदेशीर रोडशोमुळे आणि वापरलेल्या तीन चारचाकी वाहनांवर तात्काळ तेव्हाच कारवाई करणे, आणि लाखो रूपयांच्या खर्चाची माहिती लपविल्याप्रकरणी उमेदवारावर कारवाई करणे ही संबंधित निवडणूक अधिकाऱ्यांचे आद्यकर्तव्य आणि जबाबदारी असताना, मात्र निवडणूक अधिकाऱ्यांच्या संगनमताने आणि मेहरबानीमुळे कोणावरही या ठिकाणी कार्यवाही झालेली दिसून आलेली नाही. विशेष म्हणजे याबाबत तक्रारदारांनी तक्रार केल्यानंतर सुद्धा ‘त्रयस्थ’ तक्रारदार म्हणून ही तक्रार सहाय्यक निवडणूक निर्णय अधिकारी यांच्याकडून तब्बल सहा महिन्यानंतर निकाली काढण्यात आली आहे.
जिल्हाधिकारी यांच्या आदेशाला बसविले ढाब्यावर
विशेष म्हणजे विधानसभा निवडणुकीच्या काळातच दिनांक – १४/११/१०२४ रोजी जिल्हा मुख्य निवडणूक निर्णय अधिकारी तथा जिल्हाधिकारी जळगाव यांनी याबाबत तात्काळ चौकशी करून संबंधित उमेदवार आणि रोडशोसाठी महागडी चारचाकी वाहने विनापरवानगी उपलब्ध करून देणाऱ्या वाहन मालकांवर आणि रोड शोच्या आयोजकांवर कार्यवाहीचे आदेश देऊनही मुक्ताईनगर विधानसभा निवडणुक निर्णय अधिकारी यांनी सबळ पुरावे उपलब्ध असतानाही कोणतीच नियमोचित कार्यवाही केली नाही. एक प्रकारे याठिकाणी भारत निवडणूक आयोगाच्या मार्गदर्शक तत्त्वांचे निवडणूक प्रभावित करण्याच्या उद्देशाने हेतूपूर्वक उल्लंघन झालेले असून जिल्हा मुख्य निवडणूक निर्णय अधिकारी तथा जिल्हाधिकारी यांच्या याप्रकरणी कार्यवाही करण्याच्या आदेशाला ‘ढाब्यावर’ बसविण्यात आल्याचा प्रकार समोर आलेला आहे.
(भाग २ क्रमशः)
