उपमुख्यमंत्री अजित पवारांच्या दालनात लागलाय शरद पवारांचा फोटो,आजपासून कामकाजाला सुरुवात
मुंबई, दि.14:- उपमुख्यमंत्री अजित पवार यांच्याकडे आज राज्याच्या वित्त व नियोजन विभागाच्या मंत्रिपदाची जबाबदारी देण्यात आली आहे. तत्पूर्वी सकाळी त्यांनी दोन्ही विभागांच्या वरिष्ठ अधिकाऱ्यांची मंत्रालयात बैठक घेऊन वित्त व नियोजन विभागाच्या सद्यस्थितीची माहिती तसेच कामकाजाचा आढावा घेतला.अतिरिक्त मुख्य सचिव नितीन करीर,अतिरिक्त मुख्य सचिव ओमप्रकाश गुप्ता यावेळी उपस्थित होते.
उपमुख्यमंत्री अजित पवार यांच्याकडे वित्त व नियोजन विभागाच्या मंत्रिपदाची जबाबदारी सोपवण्यात आली आहे. उपमुख्यमंत्री अजित पवार यांनी आज मंत्रालयातील त्यांच्या दालनातून कामकाजाला सुरुवात केली. सकाळी लवकर मंत्रालयात आलेल्या अजित पवार यांनी वित्त व नियोजन विभागाच्या वरिष्ठ अधिकाऱ्यांची बैठक घेतल्यानंतर ते अभ्यागत नागरिकांना भेटले.
उपमुख्यमंत्री तथा वित्तमंत्री अजित पवार यांचे कार्यालय मंत्रालयातील पाचव्या मजल्यावरील 503 क्रमांकाचे दालनात असून या दालनातूनच ते आपल्या विभागांचे तसेच उपमुख्यमंत्रीपदाचे कामकाज पाहणार आहेत.
विशेष म्हणजे या दालनात राष्ट्रवादीचे नेते शरद पवार यांचा फोटो लावलेला आहे.मागील आठवड्यात अजित पवार यांनी मीच राष्ट्रवादी काँग्रेस चा अध्यक्ष असल्याचे म्हटले होते.तसेच शरद पवार यांनीही माझ्या नावाचा व फोटो चा वापर न करण्याचे जाहीर सभेत अजित पवारांना ठणकावले होते.असे असताना आज या दालनात लावलेल्या फोटो वरून जोरदार चर्चा रंगलीय हे मात्र नक्की.
