जामनेर तालुक्यात धुरंधर तरुणाची बिबट्यासोबत झुंज; जखमी अवस्थेतही बिबट्याला जिवंत पकडून वनविभागाच्या ताब्यात दिले

जामनेर (प्रतिनिधी) : जळगाव जिल्ह्यातील जामनेर तालुक्यातील शहापूर येथे एका तरुण शेतकऱ्याने बिबट्याच्या हल्ल्याला धैर्याने तोंड देत थेट बिबट्यासोबत झटापट करून त्याला जिवंत पकडल्याची थरारक घटना घडली आहे. या धाडसी घटनेची सध्या जामनेरसह संपूर्ण जळगाव जिल्ह्यात जोरदार चर्चा सुरू असून सर्वत्र या धुरंधर तरुणाच्या शौर्याचे कौतुक होत आहे.
मिळालेल्या माहितीनुसार, शहापूर येथील रहिवासी मुकेश नाना डोंगरे हे आपल्या शेत परिसरात असताना अचानक बिबट्याने त्यांच्यावर हल्ला केला. या अनपेक्षित हल्ल्यामुळे परिसरात एकच खळबळ उडाली. मात्र, भीती न बाळगता मुकेश डोंगरे यांनी बिबट्याशी प्रतिकार करत थेट दोन हात केले. काही काळ दोघांमध्ये झटापट सुरू राहिली.
या संघर्षात मुकेश डोंगरे जखमी झाले, तरीही त्यांनी हार मानली नाही. जखमी अवस्थेतदेखील त्यांनी प्रसंगावधान राखत बिबट्याला नियंत्रणात आणले आणि अखेर त्याला जिवंत पकडण्यात यश मिळविले. त्यानंतर संबंधित बिबट्याला वनविभागाच्या ताब्यात देण्यात आले.
या घटनेत जखमी झालेल्या मुकेश डोंगरे यांच्यावर सध्या जामनेर येथील शासकीय रुग्णालयात उपचार सुरू आहेत. त्यांच्या प्रकृतीवर वैद्यकीय पथकाकडून लक्ष ठेवण्यात येत असल्याची माहिती मिळाली आहे.
दरम्यान, या अभूतपूर्व धाडसाची दखल राज्याचे मंत्री यांनी घेतली आहे. त्यांनी व्हिडिओ कॉलद्वारे मुकेश डोंगरे यांच्याशी संपर्क साधून त्यांच्या प्रकृतीची विचारपूस केली तसेच त्यांच्या धैर्याचे आणि प्रसंगावधानाचे कौतुक केले. अशा संकटसमयी दाखविलेल्या शौर्याबद्दल त्यांनी शुभेच्छा देत लवकर बरे होण्यासाठी सदिच्छा व्यक्त केल्या.
शहापूरसारख्या ग्रामीण भागातील एका तरुणाने जीव धोक्यात घालून बिबट्याच्या हल्ल्याचा मुकाबला केल्याने नागरिकांमध्ये आश्चर्य आणि अभिमानाची भावना व्यक्त होत आहे. सोशल मीडियावरही या घटनेची मोठ्या प्रमाणावर चर्चा होत असून मुकेश डोंगरे यांच्या धाडसाचे सर्व स्तरांतून कौतुक केले जात आहे.
“बिबट्याशी झुंज देऊन त्याला जिवंत पकडणारा शहापूरचा धुरंधर तरुण” अशी ओळख आता मुकेश नाना डोंगरे यांना मिळत असून त्यांच्या शौर्याची चर्चा जामनेर तालुक्यासह संपूर्ण जळगाव जिल्ह्यात रंगली आहे.