भुसावळात दुचाकीस्वाराकडून २५ लाख ४२ हजार रुपयांची रोकड असलेली थैली बळजबरीने हिसकावली; गुन्हा दाखल

भुसावळ, दि. २९ ऑक्टोबर २०२५– भुसावळ तालुक्यातील सत्यसाई नगर परिसरात मंगळवारी (दि. २८ ऑक्टोबर) रात्री १०:२० वाजेच्या सुमारास तीन अनोळखी इसमांनी मोटारसायकलस्वार फिर्यादी मोहम्मद यासीन मोहम्मद ईस्माईल (वय ३९, रा. सत्यसाई नगर, खडका रोड, भुसावळ, व्यवसाय – खाजगी नोकरी) यांच्या ताब्यातील निळ्या रंगाची चेन असलेली चौकोनी पैशांची थैली बळजबरीने हिसकावून नेली. या थैलीत ५०० रुपयांच्या नोटांच्या स्वरूपात २५ लाख रुपये आणि ऑफिसचे अतिरिक्त ४२ हजार रुपये असे एकूण २५ लाख ४२ हजार रुपये  रोकड होती. सदर घटनेच्या फिर्यादीच्या तक्रारीवरून भुसावळ तालुका पोलीस ठाण्यात गुन्हा नोंदवण्यात आला असून, तो गु.र.नं. ०२०७/२०२५ असा दाखल करण्यात आला आहे. गुन्हा भारतीय न्याय संहिता (BNS) कलम ३०९(४) आणि ३(५) अंतर्गत नोंदवला गेला आहे. यामुळे भुसावळ शहरात मोठी खळबळ उडालेली आहे.

घटनेचा सविस्तर तपशील:
फिर्यादी मोहम्मद यासीन हे त्यांच्या मोटारसायकलवर (क्र. MH १९ BC ५५८६) निळ्या रंगाची चेन असलेली चौकोनी पैशांची थैली समोर ठेवून घराकडे जात होते. सत्यसाई नगर येथील कॉम्प्लेक्सजवळील रस्त्यावर (सार्वजनिक जागा) तीन अनोळखी इसमांनी त्यांच्या मोटारसायकलला मुद्दाम धडक दिली. धडकेमुळे मोटारसायकलवरील थैली खाली पडली. या संधीचा फायदा घेऊन आरोपींनी फिर्यादीच्या ताब्यातून थैली बळजबरीने हिसकावून घेतली आणि पसार झाले. फिर्यादींनी घटनेची माहिती तात्काळ भुसावळ तालुका पोलीस ठाण्यात दिली.
चोरीच्या मालाचा तपशील असा…
1) २५,००,०००/- रुपये (५०० रुपयांच्या नोटा).
2) ऑफिसचे ४२,०००/- रुपये
एकूण: २५,४२,०००/- रुपये  (निळ्या रंगाची चेन असलेली चौकोनी थैलीसह).
सदर गुन्ह्याचा तपास भुसावळ तालुका पोलीस ठाण्याचे पोलीस निरीक्षक (PI) महेश गायकवाड यांच्याकडे सोपवण्यात आला आहे. पोलीस परिसरातील सीसीटीव्ही फुटेज, साक्षीदारांचे जबाब आणि इतर पुरावे गोळा करून आरोपींचा शोध घेत आहेत.
भुसावळ पोलीसांनी नागरिकांना रात्रीच्या वेळी मोठ्या रकमेची वाहतूक करताना सावधगिरी बाळगण्याचे आणि संशयास्पद हालचाली दिसल्यास तात्काळ पोलीस नियंत्रण कक्षाशी (१००) संपर्क साधण्याचे आवाहन केले आहे.