जळगाव : माहिती अधिकार कायद्यात बनावट पावती पुस्तके देऊन माहिती दडपल्याचा आरोप; तापी महामंडळाच्या अधिकाऱ्याविरुद्ध पोलीस तक्रार
जळगाव दि-08/01/2025, माहितीच्या अधिकार कायद्यांतर्गत (RTI) मागवलेली माहिती देताना बनावट पावती पुस्तके व खोटी-अपूर्ण कागदपत्रे पुरवून शासन व जनतेची दिशाभूल केल्याचा गंभीर आरोप जळगावात समोर आला आहे. याप्रकरणी तापी खोरे सर्वेक्षण व अन्वेषण विभागाच्या जनमाहिती अधिकारी तथा सहाय्यक अभियंता (श्रेणी-१) निलेश दे. बाविस्कर यांच्याविरुद्ध जिल्हापेठ पोलीस ठाण्यात तक्रार दाखल करण्यात आली आहे.
प्रकरणाची पार्श्वभूमी :
जळगावचे कंत्राटदार अजय भागवत बढे यांनी मौजे आव्हाणी (ता. धरणगाव) येथील ‘बोदवड परिसर उपसा सिंचन योजना’ अंतर्गत २०१७ ते २०२४ या कालावधीतील वाळू उपसा, वाहतूक आणि गौण खनिज खरेदीची माहिती RTI द्वारे मागवली होती. यापूर्वी त्यांचे मित्र भारतभूषण ससाणे यांनीही याच विषयावर माहिती मागवली होती.
दोन्ही RTI अर्जांना मिळालेल्या माहितीची तुलना केल्यावर मोठी तफावत आढळली. बढे यांना पुरवलेली कागदपत्रे अपूर्ण व बनावट असल्याचा आरोप त्यांनी केला आहे. वाळू उपसा व वाहतुकीतील संभाव्य गैरव्यवहार लपवण्यासाठी प्रशासकीय पातळीवर संगनमताने बनावट पावती पुस्तके तयार करून तीच खोटी माहिती RTI मध्ये दिल्याचा दावा आहे.
तक्रारीत काय म्हटले?
तक्रारदार अजय बढे यांनी अर्जात नमूद केले की, जनमाहिती अधिकारी असलेले लोकसेवक तथा जनमाहिती अधिकारी निलेश बाविस्कर यांनी जाणीवपूर्वक सत्य माहिती दडवली व कायद्याचे उल्लंघन केले. यासाठी भारतीय न्याय संहिता (BNS) २०२३ च्या कलम २१०, २११, २१७, २२३ व २२८ अंतर्गत कायदेशीर कारवाईची मागणी केली आहे.
संभाव्य परिणाम :
वाळू व्यवहारातील मोठ्या आर्थिक गैरव्यवहाराला आळा घालण्यासाठी हे बनावट कागदपत्र वापरले गेल्याचा संशय व्यक्त होत आहे. RTI सारख्या पारदर्शक कायद्यातही अशी बनावटगिरी होणे हे प्रशासकीय यंत्रणेतील गंभीर त्रुटी दर्शवते. या प्रकरणाची सखोल चौकशी होणे आवश्यक असून, पोलीस व संबंधित विभागाची पुढील भूमिका लक्षवेधक ठरणार आहे.
