राष्ट्रवादीच्या आ. जयंत पाटलांच्या वक्तव्याचा आणि अल्पवयीन मुलीवरील अत्याचाराचा भुसावळ नाभिक संघातर्फे जोरदार निषेध
भुसावळ/जळगाव (दिनांक १५ डिसेंबर २०२५): भुसावळ शहरातील नाभिक संघाच्या वतीने आज उपविभागीय प्रांताधिकारी, भुसावळ यांना एक निवेदन सादर करण्यात आले. या निवेदनात दोन प्रमुख मुद्द्यांवर तीव्र निषेध व्यक्त करण्यात आला आहे. पहिला मुद्दा नाशिक जिल्ह्यातील सटाणा तालुक्यातील खमताणे येथे एका ९ वर्षीय अल्पवयीन मुलीवर ७५ वर्षीय वृद्धाने केलेल्या लैंगिक अत्याचाराचा, तर दुसरा मुद्दा राष्ट्रवादी काँग्रेस (शरद पवार गट) चे नेते तथा माजी मंत्री आमदार जयंत पाटील यांनी नाभिक समाजाच्या पारंपरिक व्यवसायाबाबत केलेल्या कथित अपमानजनक वक्तव्याचा आहे.
निवेदनात म्हटले आहे की, खमताणे (ता. सटाणा, जि. नाशिक) येथे नाभिक समाजातील ९ वर्षीय अल्पवयीन बालिकेवर एका ७०-७५ वर्षीय (निवेदनात ७० वर्षे नमूद) क्रूर व्यक्तीकडून लैंगिक अत्याचार झाला. हे कृत्य समाजविरोधी आणि मानवतेविरोधी असून, अशा नराधमावर कठोर कारवाई करण्यात यावी, अशी मागणी संघटनेने केली आहे. (संदर्भार्थ: ही घटना नाशिक जिल्ह्यात नुकतीच उघडकीस आली असून, संशयित आरोपी नामदेव हरी गुंजाळ याला पोलिसांनी अटक केली आहे. पीडितेला पैसे आणि चॉकलेटचे आमिष दाखवून गेल्या सहा महिन्यांपासून अत्याचार केल्याचा आरोप आहे.)
दुसऱ्या मुद्द्यात नाभिक संघाने नमूद केले की, नाभिक (न्हावी) समाजाला संत सेना महाराजांचा वारसा लाभला आहे. संत शिरोमणी संत सेना महाराजांनी “वारीक बारीक करू हजामत बारीक” या ओळींमधून नाभिक व्यवसायाचे रूपक वापरून आध्यात्मिक शिकवण दिली आहे. यात मनातील विकार, वाईट विचार आणि अहंकाराची स्वच्छता करणे, विवेक (आरसा), वैराग्य (चिमटा) आणि शांती (पाणी) या साधनांचा वापर करून आत्मशुद्धी कशी करावी याचे विवेचन आहे. असा हा समाजप्रबोधनाचा वारसा असतानाही, आमदार जयंत पाटील यांनी दिनांक १३ डिसेंबर २०२५ रोजी विधानसभेत किंवा एखाद्या भाषणात पोलीस प्रशासनाच्या संदर्भात नाभिक समाजाच्या व्यवसायाचा उल्लेख अत्यंत खालच्या पातळीवर आणि चुकीच्या पद्धतीने केला. ही चूक भुसावळचे आमदार तथा वस्त्रोद्योग मंत्री संजय सावकारे यांनी त्यांच्या लक्षात आणून दिल्यानंतरही त्यांनी अपमानजनक शब्द मागे घेण्यास किंवा माफी मागण्यास नकार दिला.
यामुळे नाभिक समाजात तीव्र संताप व्यक्त होत आहे. निवेदनात म्हटले आहे की, हे वक्तव्य समाजाप्रती तिरस्कार, हिनता, द्वेष आणि असामंजस्याची भावना दर्शवते. भुसावळ शहर नाभिक संघ तसेच सकल नाभिक समाजाच्या वतीने या वक्तव्याचा जाहीर निषेध करण्यात येतो आणि आमदार जयंत पाटील यांनी तात्काळ समाजाची जाहीर माफी मागावी, असे आवाहन भुसावळ तालुक्यातील नाभिक समाजाच्या वतीने करण्यात आले आहे.
निवेदनावर सचिन सोनवणे, समय बोरसे, विनोद आंबेकर, प्रशांत बाणाईत, पंडित समासे, माला दिल, रविंद्र अकर, पुरुषोत्तम रामदास हेमकर, विलास सुरेश जगताप , शांताराम बाणाईत यांच्यासह समाजबांधवांच्या सह्या आहेत.
